БИШКЕК, 27-фев. — Sputnik. Башкы прокуратура "Ата Мекен" фракциясынын лидери Өмүрбек Текебаевдин президент Алмазбек Атамбаевдин Кипрде оффшордук аймакта мүлкү бар деген маалыматты төгүнгө чыгарды.
Буга чейин айрым ЖМКларда депутаттын Кипрде Алмазбек Атамбаевдин мүлкүнө байланыштуу материалдарга ээ болгонун жазып чыгышкан. Өлкө башчы Башкы прокуратурага Текебаевдин айткандарын текшерип, жыйынтыгы тууралуу коомчулукту маалымдар кылууну тапшырган.
Башкы көзөмөл орган президент тууралуу мыйзамга ылайык, анын ар-намысына шек келтирген билдирүүнү көңүл сыртында калтырбаганын белгиледи.
"Эгер Өмүрбек Текебаев жок дегенде айткан маалыматтарын үстүртөн текшерип чыкканда, мындай жалган сөздү таратмак эмес", — дешти прокуратурадан.
"Атамбаев буга чейин да, азыр да киреше булагына ээ", — деп айтылат маалыматта.
Башкы прокуратура бир нече ирет талап кылганына карабай Текебаев ушу кезге чейин Атамбаевдин мүлкү боюнча эч кандай далил материалдарын бербегенин кошумчалады.
Эскерте кетсек, Текебаев MegaCom компаниясына байланыштуу коррупция менен алдамчылыкка шектелип кармалган. Анын тарапташтары учурда нааразылык акциясын өткөрүп, депутаттын камактан бошотулушун талап кылып жатышат.
