БИШКЕК, 24-фев. — Sputnik. Кытай бийлиги шаар борборлорунда атайын улгайган адамдар үчүн уюштурулуучу көчө бийлерине эмки айдан тарта тыюу салышы мүмкүн экенин China Daily гезитине таянуу менен РИА Новости жазып чыкты.
Пекиндин кайра каралып чыккан жобосуна ылайык, мындай иш-чаралар коомдук тартипке зыянын тийгизбеши керек. Мыйзам бузгандарга айып пул салынып, атургай кылмыш иши козголушу ыктымал.
Кытайлык пенсионерлер кечкисин шаардын борбордук аянттарына чыгып, бийлеп эс алууну адатка айландырышкан. Катуу чыккан музыканын үнүн жактырбаган калаа тургундары карыялар менен араздашып келет.
Макалада улгайган адамдардын чер жазып, колу-бутун чоюп бийлөөсүнө чек коюу менен бийлик жашоочулар арасындагы пикир келишпестикти мыйзам жолу менен чечүүгө болорун далилдегиси келери белгиленүүдө.
