ОШ, 21-фев. — Sputnik. Чаткал РИИБдин эки милиция кызматкери Ак-Ташта жол жоктугунан улам үйлөрүнө беш күндөн бери кете албай бүгүн трактор менен жолго чыгышты. Бул тууралуу Ак-Таш айылынын жашоочусу Жанар Рысдөөлөтов аймактык кабарчыга билдирди.
Чаткал РИИБдин эки кызматкери иш сапары менен Ак-Таш айылына мындан беш күн мурда келишкен. Бирок 13-февралдан бери күн сайын 50 сантиметрден жааган кардан улам жолдор ачылбай айылдан сыртка чыга албай калышкан.
"Эки милиционер беш күн бою менин үйүмдө түнөштү. Бирок жол дагы деле жабык. Милиция кызматкерлери бүгүн айылдагы тракторлордун бири менен жөнөп кетишти. Алар 10 чакырым алыстыкта жайгашкан Кызыл-Алма капчыгайына чейин бара алышат. Андан ары райондун борбору Каныш-Кыя айылына чейин 40 чакырым жүрүшөт", — деди Рысдөөлөтов.
Эске сала кетсек, Чаткал районунда 2017-жылдын 11-февралынан тартып тынбай жааган кардын натыйжасында Каныш-Кыя жана Чаткал айыл аймактарында кардын калыңдыгы эки метрге чейин жетип, ички чарбалык жолдор жабылган.
