БИШКЕК, 15-фев. — Sputnik. Чаткалга түшкөн калың кардын айынан жергиликтүү жашоочулар азык-түлүксүз калгандыгын Sputnik Кыргызстан агенттигинин аймактык кабарчысына Чаткал районунун Ак-Таш айылынын тургуну Жанарбек Рысдөөлөтов билдирди.
Анын айтымында, аталган райондун аймагына беш күндөн бери тынымсыз кар жаап, калыңдыгы үч метрге чейин жеткен.
"Үйдөн чыгып 500 метр аралыкка жөө басууга болот. Андан ары башка айылдарга, райондун борборуна же коңшулаш Аксы, Ала-Бука райондоруна чыгууга такыр мүмкүнчүлүк жок. Азыр дагы кар себелеп жатат", — деди Рысдөөлөтов.
Ал билдиргендей Ак-Таш айылы райондун борборунан 50 чакырым алыстыкта жайгашып, анда 170 түтүн жашайт.
"Кар минтип калың жаай турганын билбегендиктен азык-түлүктү алдын ала камдаган эмеспиз. Эми жергиликтүү дүкөндөрдө азык-түлүк түгөнө баштады. Тиешелүү кызматтардан жардам сурайбыз. Элге эң негизгиси азык-түлүк керек", — деди тургун.
Ал эми ӨКМдин маалымат кызматы №27 жол тейлөө кызматына жолдорду тазалоо иштерин жүргүзүү тапшырмасы берилгенин билдирди.
"Чаткал районуна калыңдыгы эки метрге жеткен кар түштү. Учурда Жол тейлөө кызматына авто жолдорду тазалоо тапшырмасы берилди. Ал эми айыл округдардын башчыларына үйлөрдүн чатырларын кардан арылтуу иштерин жүргүзүүгө көмөк көрсөтүү иштери жүктөлдү", — деп айтылат маалыматта.
"Шарттын катаалдыгына байланыштуу сегиз мектеп, 13 бала бакча убактылуу ишин токтотту. Ал эми үйлөрдүн чатырларынан жана башка имараттардан карды тазалоого жашоочулар тартылды", — деди Макетаев.
Ал белгилегендей Чаткал — Ала-Бука унаа жолун тазалоого 27-жол тейлөө башкармалыгынын кызматкерлери чыккан.
