БИШКЕК, 20-фев. — Sputnik. Өлүмгө алып келген жол кырсыгына тийиштиги бар Россия элчилигинин айдоочусуна карата кылмыш иши козголду. Бул тууралуу Бишкек ШИИБи билдирди.
Эскерте кетсек, 16-февраль күнү Васильев менен Фучик көчөлөрүнүн кесилишинде Mercedes Sprinter менен Toyota Land Cruiser Prado унаалары сүзүшкөн. Кырсыктын кесепетинен жүк ташуучу микроавтобустун айдоочусу Евгений Лексин каза болгон. Ал эми жол тандабас Россия элчилигине таандык кызматтык унаа экенин, рулда өкүлчүлүктүн кызматкери баратканын аталган элчилик тастыктаган.
Жол кырсыгынан каза болгон жарандын аялы аларга элчиликтен эч ким чалып көңүл айтпаганын, ал-абалын сурабаганын айрым ЖМКлар жазып чыгышты.
КРдеги Россия элчилигинин маалымат катчысы Дарья Пахомова түрдүү шарттарга байланыштуу элчиликтин кызматкерлери маркумдун жакындарына түздөн-түз байланыша албаганын билдирди.
Элчилик жол кырсыгы боюнча ички кызматтык териштирүү жүргүзүүдө.
