БИШКЕК, 16-фев. — Sputnik. Кара-Суу районунун Шарк айылдык кеңешинин 11 депутаты 10 күндөн бери дайынсыз. Мунун айынан бүгүн айыл өкмөт башчысы шайланбай, ага кошо айылдык кеңеш дагы тарап кетүү алдында турат. Бул туурасында Sputnik Кыргызстан агенттигине аталган айылдык кеңештин депутаты Алмаз Аман уулу билдирди.
Белгилей кетсек, Шарк айыл өкмөт башчысын шайлоо бүгүн 16-февралга белгиленген болчу.
Мыйзам боюнча айыл өкмөт башчысын шайлоого 31 депутаттын 21и катышса кворум түзүлмөк. Ал эми добуш берүү бүгүн саат 9.00дөн 12.00гө чейин өткөрүлүүсү керек болчу.
БШКнын Кара-Суу району боюнча шайлоо коммисиясынын төрагасы Назарбек Султанов жыйынга 17 гана депутат катышкандыктан айыл өкмөт башчысын шайлоо өтпөй калганын Sputnik Кыргызстан агенттигине маалымдады.
"Депутаттар кайрадан шайлоо өткөрүү боюнча Борбордук шайлоо комиссиясына арыз жазышты. Эми алар дагы бир күндү бекитип берет же айылдык кеңешти таратып кайра башынан шайлоо өткөрүүнү карап чыгат" — деди Султанов.
Ошондой эле ал Шарк айыл өкмөт башчысын шайлоо бүгүн экинчи ирет өтүп жатканын белгиледи. Биринчисинде талапкерлер мыйзамда көрсөтүлгөн 50 пайыздык добушту ала алган эмес.
Ал эми Ош ШИИБнин маалымат катчысы Жеңиш Ашырбаев 11 депутаттын жоголгондугу туурасында териштирүү иштери жүргүзүлгөнүн билдирди.
"Бизге 11 депутаттын жоголгондугу туурасында расмий түрдө эч ким кайрылган эмес. Бирок ЖМКларга чыккан маалыматтар боюнча териштирүү жүргүзгөнүбүздө жакындары аларды Тажикстанга эс алууга кеткенин айтып, 16-февралда айыл өкмөт башчысын шайлоого келерин билдиришкен" — деди Аширбаев.
Ал учурда аталган аймактагы кырдаал тартип коргоо кызматкерлеринин көзөмөлүндө турганын кошумчалады.
