БИШКЕК, 8-фев. — Sputnik. Башкы прокуратура өспүрүмдөрдүн саламаттыгына залака тийгизген сайттарды жаап салууну пландап жатат. Бул тууралуу аталган ведомстводон билдиришти.
Башкы көзөмөлдөөчү орган бул кадам өспүрүмдөрдү камкордукка алуу максатында жасалып жатканын кошумчалады.
"7-февралда Башкы прокуратура Бишкектеги Октябрь райондук сотуна доо арыз менен кайрылды. Анда Кыргызстандын аймагында интернет аркылуу жайылтууга тыюу салынган маалыматтар камтылган сайттарды жаап салуу сунушу берилген", — деп айтылат маалыматта.
Ведомстволор аралык топтун курамына шаардык прокуратуранын кызматкерлеринен сырткары, Мамлекеттик информациялык технологиялар жана байланыш комитети, Бишкек шаардык ИИБ, Бишкектин билим берүү башкармалыгы жана коммерциялык эмес уюмдун өкүлдөрү кирген.
