Спикер Чыныбай Турсунбеков ордунда калып, премьер-министр Сооронбай Жээнбеков кызматтан алынышы мүмкүн. Бул тууралуу Sputnik Кыргызстан агенттигине легендарлуу парламенттин депутаты, коомдук ишмер Жамин Акималиев билдирди.
"Президенттик шайлоо алдында саясатсыз бир да маселе болбой калды. Бирок кечээ күнкү жаңжалга экономикалык, социалдык маселелер себеп болду. Анткени өлкөнүн ЕАЭБге кирүүсү максатына жеткен эмес. Өкмөттүн шалаакылыгынан улам экономикалык абал начар болуп турат. Сооронбай Жээнбеков көп жерде иштегени менен дээңгели республиканы башкарганга жетпей калды. Негизиги себептердин бири ушул", — деди Акималиев.
Ал Өмүрбек Бабанов спикерге ызаланып, ачууга алдырып койгонун, бирок төрага мындан жыйынтык чыгарышы керектигин кошумчалады.
"Сооронбай Жээнбеков менен Чыныбай Турсунбековду кызматтан кетирүү боюнча сунуштарды оппозициячыл маанайдагы фракциялар киргизишти. Көпчүлүк коалициясынын да ою бар. Ошондуктан төраганы кызматтан алууга негиз жок", — деди ал.
Акималиев КСДП лидери Иса Өмүркулов дагы өкмөттү катуу сындагандыгын айтып, Сооронбай Жээнбековдун кызматтан алынышы мүмкүндүгүн кошумчалады.
