БИШКЕК, 01-фев. — Sputnik. Кыргызстандын биринчи вице-премьери Мухамметкалый Абулгазиев АСТ түрк авиакомпаниясынын башкы директору Желал Карабаш баштаган өкүлдөрдү кабыл алды. Бул тууралуу өкмөттүн маалымат кызматынан кабарлашты.
Билдирмеге караганда, жолугушуу 31-январда өтүп, Дача айылына кулап түшкөн учак кырсыгынын чыгымдары тууралуу талкуу жүргөн.
"Түрк тарап чыгымдар боюнча жардам берүүгө, жетим калган балдарга психологиялык колдоо көрсөтүүгө, аларды орто мектептен баштап жогорку билим алуусуна чейин камкордукка алууга жана башка мамлекеттик чыгымдарды биргеликте чечүүгө даяр экенин билдирди", — деп айтылат маалыматта.
"Boeing-747 учагы буга чейин Гонконг-Бишкек-Стамбул багыты боюнча бир нече жолу жүк жеткирген. Ар бир каттамда Бишкекке конуп, Стамбулга чейин кошумча күйүүчү май куюу менен экипаж мүчөлөрүн алмаштырып келген. Жүк Бишкекке багытталган эмес", — деп билдирген Карабаш.
Ал эми өкмөттүк комиссия кыска убакыт аралыгында АСТ түрк авиакомпаниясына Boeing-747 учагынын кыйрашына байланышкан чыгымдар тууралуу толук маалымат берилерин кошумчалады.
