БИШКЕК, 31-янв. — Sputnik. Дача айылындагы авиакырсыктан кыйраган тамдардын ордуна жаңы турак жайлар курулбайт. Бул тууралуу Өзгөчө кырдаалдар министри Кубатбек Боронов аталган айыл эли менен жолугушуу учурунда билдирди.
ӨКМ жетекчиси кырсыктан жабыркагандар үчүн мамлекет тарабынан тийиштүү жардамдын баары берилип жатканын, учурда аларды убактылуу баш пааналай турчу жай менен камсыздоо башкы маселе экенине токтолду.
"Учурда ӨКМдин эсеби ачык, ага 42 миллион сомдон ашуун каражат чогулду. Гуманитардык жардам ар тараптан келип жатат. Анын баары калыс бөлүштүрүлөт", — деди Боронов.
Дача айылында жашагандардын кийинки тагдыры тууралуу маселе өкмөттүн деңгээлинде чечиле турганын кошумчалап, кыйраган үйлөрдүн ордуна жаңы турак жай салынбай турганын баса белгиледи.
Дача айылынын тургундары жолугушуу соңунда бардык суроолорго жооп алгандыктарын билдиришти.
Эскерте кетсек, 16-январь күнү эртең менен Гонконгдон Стамбулду көздөй келе жатып, "Манас" аэропортуна май куюу үчүн токтомок болгон жүк ташуучу учак Дача айылына кулап түшкөн. Андан 39 адамдын өмүрү кыйылып, 20дан ашуун үй жараксыз абалга келген.
