БИШКЕК, 27-янв. — Sputnik. Кыргызстандын Улуттук коопсуздук мамлекеттик комитети 16-январда "Манас" аэропортуна жакын жердеги Дача айылына кулаган учактагы жүк кайсы жакка жеткирилмектигин иликтеди.
Маалыматка ылайык, АСТ Airlines түрк авиакомпаниясына таандык Boeing 747-400 учагында 75 758 тонналык тиричилик техникасы, уюлдук телефондор үчүн аксессуарлар болгон.
"Текшерүү учурунда аныкталгандай аталган борт №ТК 6491 аба каттамы аркылуу Гонконг — Бишкек — Стамбул багыты боюнча такай учуп турган. Ошондой эле "Манас" аэропортуна май куюу жана экипажды алмаштыруу үчүн конуп турган", — деп айтылат билдирүүдө.
Ошондой эле жүк арасындагы 1902 тонна "USB-чакмак ташты" JTI Kazakhstan LLC компаниясынын Кыргызстандагы өкүлчүлүгү заказ берген.
Учактагы калган жүктөр Стамбулдан башка мамлекеттерге жеткирилмек.
"Кыргызаэронавигация" мамлекеттик ишканасынын берген расмий маалыматына ылайык, авиакырсык болгонго чейин №ТК 6491 каттамы боюнча Гонконг — Бишкек — Стамбул багыты менен 49 жолу учуу болгон. Аталган каттам "Р" формасы аркылуу жасалгандыктан товарлар "Манас" аэропортунан түшүрүлүп же, жүктөөгө коммерциялык укук берилген эмес.
Белгилей кетсек, буга чейин АСТ Airlines түрк авиакомпаниясынын өкүлү учакта 86 тонна жүк болгонун айткан. Ал эми эл өкүлү Өмүрбек Текебаев учак 52 жолу келип конгонун билдирген эле.
16-январда Дача айылына кулаган учак 39 кишинин өмүрүн алды.
