Үч эмдин энеси: жалгыз бой болуп, батирде жашасам да балдарым жанымда

Sputnik Кыргызстан агенттигинин каарманы болгон үч эмдин энеси жалгыз бой Бактыгүл Камчыбек кызынын балдары учурда бир жаш алты ай болуп калды. 

Буга чейин редакция 23 жаштагы Бактыгүл үч эм — эки кыз, бир уул төрөгөндүгү тууралуу жазган. 

Учурда балдардын ал-абалы жакшы. Бирок алар бир бөлмөлүү, эч кандай шарты деле жок батирде жашап күн кечиришет. 

"Бир жашка чейин үч эм менен балдар үйүндө жашап, ошол жактан чоңойдук. Андан соң батирге чыкканбыз. Алар кичине чоңоюп тамак жеп калганда базарга жумушка чыктым. Балдарды жалдап бирөөгө каратам. Батирге 3500 миң, балдарды караган адамга 6000 төлөп берем. Бирок жумуш бирде болуп, бирде болбойт. Жолдошум боюмда барда, бир айлык кезинде эле ажырашып кеткенбиз. Үч эм төрөлгөнүн билет, бирок келген жок. Үчөөнү жалгыз кароо кыйын эле, бирок балдарымды эч кимге кор кылбай багам, булар менин келечегим да", — деди үч эмдин апасы.

Жалгыз бой эненин тапкан кичине акчасы батир ижарасы менен баккан кишиден ашпайт экен. "Жок дегенде өз үйүм болсо, балдардын кийим-кече, тамак-ашыбызга акчам кененирээк болот" деген эне балдарын эч нерседен кем кылбай, эл катарында чоңойтсом деген үмүттө.

Бактыгүлдүн айтымында, ага убагында өкмөт тарабынан акчалай жардамдар көрсөтүлгөн, бирок ал каражат балдардын майда-чүйдөсүнөн ашкан эмес. Андан кийин да Бактыгүл өкмөттөн жана атка минерлерден жардам сураган. 

"Кайын журтум менен болгон түшүнбөстүктөрдөн улам үйдөн чыгып кеткем. Өзүмдүн энем күйөөм менен жашашымды каалабагандыктан, ал жакка да бара албайм. Баш калкалай турган жайым жок. Андыктан президенттин жана өкмөт чиновниктеринин ар тараптуу жардамы учурда зарыл болуп турат", — деп айткан Бактыгүл жаңы төрөгөн кезинде. 

Там-туң баскан чүрпөлөрүн бооруна кыскан эне учурда да жардамга муктаж.