БИШКЕК, 18-янв. — Sputnik. Дача айылына кулап түшкөн учактан жабыркагандарга жана каза болгондордун үй-бүлөсүнө Кыргызстандын адвокаттары бекер жардам берүүгө даяр экенин жактоочу Наргиза Абдраимова Sputnik Кыргызстан агенттигине билдирди.
Анын айтымында, юристтердин тобу Кыргызстандын адвокатурасына ушундай демилге менен кайрылып, 10дон ашык адвокат бекер жардам берүүгө даярдыгын билдиришкен. Абдраимова жардам берем дегендердин саны өсүп жатканын кошумчалады.
"Азыр жабыркагандар менен каза болгондордун үй-бүлөсүнө адвокаттардын жардамы керек. Кырсыктан улам көбүнүн документтери күйүп, жоголуп кетти. Айрымдары тууганынын өлгөнү боюнча күбөлүк алышы керек. Биз юридикалык жардам берүүгө даярбыз, анын ичинде жөлөк пул төлөп берүү маселеси боюнча да жардамыбызды аябайбыз", — деди Абдраимова.
Бардык тиешелүү маселелер боюнча 0 770 89-89-08 телефондору аркылуу байланышууга болот.
Белгилей кетсек, 2017-жылдын 16-январында Гонконгдон Стамбулду көздөй келе жатып, Бишкектен май куюу үчүн "Манас" аэропортуна токтомок болгон Boeing-747 учагы Дача айылынын үстүнө саат таңкы 7:18де кулаган. Кырсыктан 38 киши көз жуумп, 16 киши жабыркаган.
