БИШКЕК, 17-янв. — Sputnik. Республикалык сот-медициналык экспертизалар борборунда авиакырсыктын кесепетинен каза болгон 37 жарандын аты-жөнү такталды. 31 сөөктүтуугандары алып кетти. Бул тууралуу Sputnik Кыргызстан агенттигине Саламаттык сактоо министрлигинин медициналык жардам көрсөтүү жана дары-дармек саясаты боюнча башкармалыгынын жетекчиси Самат Тойматов билдирди.
Анын маалыматына караганда, моргго жалпы 37 сөөк келип түшкөн. Алардын 36сын туугандары тааныган.
"Бир сөөк таанылды, бирок бул маалыматты тактоо үчүн туугандарын күтүп жатабыз. 31 сөөктү алып кетишти. Учурда алты дене калды. Аларды жакында алып кетишет", — деди Тойматов.
Эске салсак, кечээ күнү Гонконг — Стамбул каттамы менен учкан MyCargo Airlines авиакомпаниясына таандык Boeing-747-400F учагы "Манас" аэропортуна жакын жердеги Дача айылына кулап түшкөн. Анын кесепетинен кыркка киши каза болуп, 23 үй бузулган. Белгилей кетсек, өкмөт каза болгондордун үй-бүлөлөрүнө 100 миң сомдон жардам көрсөтүлөөрүн билдирген.
