БИШКЕК, 16-янв. — Sputnik. "Манас" аэропортунан анча алыс эмес жердеги Дача-Суу айылына кулап түшкөн учак бир үй-бүлөнүн өмүрүн алганын Кудрет Тайчабаров Sputnik Кыргызстан агенттигине билдирди.
Тайчабаровдун айтымында, кулаган учак анын тууганы Залкарбек Орозбаевдин үйүн фундаментинен бери бузуп кеткен. Кырсыктан үйдөгү беш киши тең каза болгон.
"Үйдөн эч нерсе калган эмес, учак келип түшкөндө үйдүн фундаментинен бери омуруп кетиптир. Тууганым Залкар баласын апасына таштап коюп келинчеги менен Москвада иштеп жүргөн. Атасы да ооруп жүрүп өтүп кеткен эле", — деди ал.
"Карындашы турмушка чыгам деп даярданып жүргөн болчу. Шаардагы кафелердин биринде иштечү. Бир карындашы турмушка чыккан эле. Апасы болсо базарда соода кылчу. Ушул жерден жер үлүшү арзан экен деп алып, там салышкан", — деди ал.
Ошол жерде жоготуу болгондордун арасынан эң оору жоготуу Залкардыкы болгонун Тайчабаров айтып кейиди.
Учактын кулашынан улам 17-январь Кыргызстанда аза күтүү күнү деп жарыяланды.
Учактын кыйрашына байланыштуу бардык маалыматтардын топтомун бул жактан окуңуздар>>
