БИШКЕК, 16-янв. — Sputnik. Жүк ташуучу унаа конуу тилкесинен өтүп, куйругу менен аэропорттун дарбазасын илип кеткен да үйлөрдүн үстүнө кулаган деп болжолдонуп жатат. Бул тууралуу журналисттерге биринчи вице-премьер Мухамметкалый Абулгазиев билдирди.
Бүгүн саат 7.18де Гонконгдон Стамбулду көздөй багыт алган жүк ташуучу лайнер эл аралык "Манас" аэропортунан анча алыс эмес Дача-Суу айылынын аймагына кулап түшкөн. Кырсыктан 23 турак жай жараксыз абалга келген.
Абулгазиев экипаж 7.15те конууга уруксат сураганын айтып, макулдук алгандан кийин кырсыкка кабылганын белгиледи.
"Конуу тилкесинен өтүп кеткен учак аэропорттун дарбазасын илип, үйлөргө кулаган. Учактын ортоңку бөлүгү толугу менен кыйрап калган. Алгач, аба кемеси Дача СУ эмес, башка жерге кулагандыгы тууралуу маалымат түшкөн", — деди атка минер.
Эртең Мамлекеттер аралык авиациялык комитет менен учак таандык болгон компаниянын өклдөрүнүн келиши күтүлүп жатат. Абулгазиев учак кулаган аймактын басымдуу бөлүгүндө издөө иштери соңуна чыкканын кошумчалады.
"Кырсыктын себептерин айтууга эрте. Жыйынтык териштирүү ишинен кийин жарыяланат", — деди ал.
Абулгазиев учак уюлдук телефон менен эл керектөөчү товарларды алып келе жатканын айтып, жабыркагандарга жардам берип жаткан кыргызстандык менен казакстандыктарга ыраазычылык билдирди.
Ал эми 17-январь Кыргызстанда аза күтүү күнү деп жарыяланды.
