БИШКЕК, 10-янв. — Sputnik. Ош аэропортунан жасалма документ менен тажик жараны кармалды. Бул тууралуу Мамлекеттик чек ара кызматынын маалымат кызматы кабарлады.
Билдирүүдө жазылгандай окуя 10-январь күнү катталган.
"Москва-Ош" каттамы боюнча "Ош-аэропорт" көзөмөл пунктунан чек ара кызматкерлери чек арадан мыйзамсыз өтүп бара жаткан 1970-жылы туулган С.Х аттуу Тажикстандын жаранын кармашкан. Анын документтерин текшерүү учурунда чет өлкөлүк паспорту жасалма экени аныкталган", — деп жазылат маалыматта.
Учурда кармалган адам УКМК кызматкерлерине өткөрүлүп берилген.
