БИШКЕК, 27-дек. — Sputnik. Оор атлетчи Иззат Артыковдун допинг колдонгондугу боюнча сот 11-январда Швейцарияда өтөт. Бул тууралуу Sputnik Кыргызстан агенттигине Артыковдун машыктыруучусу Үсөнкан Майназаров билдирди.
Ал жолго кетчү чыгымдарга каражат булактары изделип жаткандыгын айтты.
"Сотто Иззатттын допинг колдонбогондугун далилдөө үчүн бардык аракетибизди жумшайбыз. Негизи сотко спортчу менен кошо машыктыруучусу жана оор атлетика боюнча федерациядан бир өкүл барышы керек. Учурда барып келүүгө кете турган чыгымдарга каражат булактарын издеп жатабыз. Эгер табылбай калса Иззат өзү жалгыз барат. Азырынча мамлекет тарабынан эч кандай колдоо көрсөтүлө элек", — деди Майназаров.
Белгилей кетсек, быйыл Рио-де-Жанейро шаарында өткөн Олимпиада оюндарында Иззат Артыков оор атлетика боюнча коло медалды багындырган. Көп өтпөй Оор атлетика боюнча эл аралык федерация (IWF) аны антидопинг эрежелерин бузган деп айыптап медалынан ажыраткан.
