БИШКЕК, 27-дек. — Sputnik. Жакында эле Жалал-Абад шаарында "Кан берип, өмүр тартуула" донорлук акциясы болуп өттү. 100дөн ашык студент кан борборуна келип өз ыктыяры менен кан тапшырган. Иш-чараны Жалал-Абад мэриясына караштуу жаштар комитети жана студенттер уюштурган.
Аталган акция жана кан тапшырууда келип чыккан жагдайлар боюнча Жалал-Абал облустук кан борборунун башкы дарыгери Нурдин Эрматов айтып берди.
Анын пикиринде, кан тапшыра турган адамдын эң биринчи ден соолугу чың болушу керек.
"Ыктыярдуу түрдө кан тапшырганы келген жарандар кубандырганы менен алардын организминде кан аркылуу жуга турган оорулар болсо, алардын каны донорлукка жарабайт. Алсак, адамдын кан басымы, кант диабети, анемия, сарык, ВИЧ/СПИД, бруцеллез, безгек, жүрөк, гипертониянын 2-3-баскычы, сифилис жана башка ушул сыяктуу кан аркылуу өтө турган оорулар менен ооруган адамдан кан албайбыз", — деди дарыгер.
Ал белгилегендей аталган акцияга катышкан жаштардын ичинен 50 адам кан тапшырган. Калганы жогорудагы көрсөткүчтөр боюнча талаптан өткөн эмес. Ошондон улам донор болууну каалаган адамдардын саны көбүрөөк болгону оң.
Эрматов донор кылдаттык менен тандаларын белгиледи.
"Адам донор болуп, канын тапшырып кеткенден кийин деле анын канын СПИД борборуна, тиешелүү лабораторияларга жөнөтүп жыйынтыгын алабыз. Эгер кан таза эмес болсо ошол жерден утилизация болуп жокко чыгарылат", — деди ал.
"Ден соолугу жакшы адамдар кан тапшырса, анын канынын курамы кайра эле 24 сааттын ичинде өз калыбына келет. 2-3 айда бир тапшырса эч кандай коркунуч алып келбейт", — деди Эрматов.
Белгилей кетсек, канды 18 жаштан 60 жашка чейинки адамдар тапшыра алышат. Оорулуулардан сырткары, мүмкүнчүлүгү чектелген жарандардын каны донорлукка жарабайт.
