БИШКЕК, 20-дек. — Sputnik. Россиянын Түркиядагы элчиси Андрей Карловго кол салуу болгон иш-чарада Кыргызстандын элчиси Ибрагим Жунусов да болгонун ТИМ өкүлү Айымкан Кулукеева Sputnik Кыргызстан агенттигине билдирди.
Эскерте кетсек, Анкарада өтүп жаткан сүрөт көргөзмөсүнүн ачылыш аземинде россиялык элчи Карловго ок атылып, оор абалда ооруканага жеткирилген. Алган жараатынан улам дипломат көз жумган.
"Иш-чарага КР элчиси Ибрагим Жунусов Россия элчилиги тарабынан чакырылган. Бактыга жараша, кыргызстандык дипломат жабыркаган жок", — деди Кулукеева.
Окуядан дипломаттан тышкары дагы үч адам жаракат алды. Куралдан ок чыгарган жаран ошол эле жерден полиция тарабынан жок кылынган.
Түрк бийлиги күнөөлүүлөр жазалана турганын убадалап, окуяны террордук акт деп атоодо. Учурда Москва дипломаттын өлүмүнө байланыштуу көңүл айтууларды кабыл алып жатат.
