БИШКЕК, 13-дек. — Sputnik. Ош облусундагы Кара-Суу районуна караштуу Мамажан айылындагы мүрзөлөрдү казып маркумдардын сөөгүн жеген 11 чөөнүн үчөө атып өлтүрүлдү. Бул тууралуу Sputnik Кыргызстан агенттигинин аймактык кабарчысына Жоош айыл өкмөтүнүн башчысы Жылдызбек Тиллабаев билдирди.
Анын айтымында, чөөлөрдү атып өлтүрүү үчүн атайын мергенчилер жалданган.
"Чөөлөрдү атып өлтүрүү үчүн Кара-Кулжадан келген мергенчилерди жалдаганбыз. Бирок алар таба албай коюшту. Кийин Абылкасым Жаныбаев аттуу жергиликтүү мергенчи менен сүйлөшүп ар бир атылган чөө үчүн 1500 сомдон төлөп берүүгө макулдаштык. Ал үч чөөнү атып келди", — деп билдирди Тиллабаев.
Мергенчи Абылкасым Жаныбаев үч чөө 8-декабрга караган түнү Мамажан менен Маданият айылдарынын чектешкен аймактагы эгин талаасындагы камыштардын арасынан атып өлтүрүлгөн.
Анын айтымында, жыл башынан бери жалпы 14 чөө атып өлтүргөн.
Айыл өкмөттүн ветеринары Жолдубай Жоробаев атылган чөөлөр атайын казылган чуңкурга көмүлүп, зыянсыздандырыла турганын билдирди.
Ал эми Мамажан айылынын башчысы Жаныбек Бакиев жергиликтүү тургундар мурдагыдай кооптонбой калышканын билгиледи.
