БИШКЕК, 9-дек. — Sputnik. "Русгидро" ачык акционердик коому Жогорку Нарын каскадынын ГЭСине сарптаган каражатты кайтарып алууну көздөп жатканын Sputnik Кыргызстан агенттигине орус энергокомпаниясынын маалымат кызматынан билдиришти.
Мурдараак орус ЖМКлары "РусГидро" ААКтын башкы директору Николай Шульгинов Жогорку Нарын каскадына сарпталган каражатты кайтарып алуу аракеттерин көрүп жатканы жарыяланган. Ошондой эле каражатты сүйлөшүү жолу менен ала албаса, Кыргызстанды эл аралык арбитраждык сотко берери кошумчаланган. Орус тарап долбоорго 35-36 миллион доллар жумшаган.
"Ооба, биз бул маалыматты тастыктайбыз. Ал эми сандар боюнча эч нерсе айта албайбыз, такталышы керек", — деп айтылат маалымат кызматынын билдирүүсүндө.
Sputnik Кыргызстан агенттиги иштин жоо-жайын билүү максатында Улуттук энергохолдингге кайрылганда бул суроо Өнөр жай, энергетика жана жер казынасын пайдалануу боюнча мамлекеттик комитетине тиешелүү экенин айтышты.
Алдын ала маалымат боюнча ГЭСтин кубаттуулугу 237 мегаватт. Бирок былтыркы жылдын аягында президент Алмазбек Атамбаев Кыргызстан Камбар-Ата-1 жана Жогорку Нарын каскад ГЭСтерин Россия менен биргелешип куруу келишиминен чыгуу мүмкүнчүлүктөрүн карап, жаңы инвестор изделип жатканын айткан.
Ал эми денонсация боюнча мыйзамга президент 22-январда кол койгон.
9-августта Жогорку Нарын каскады менен Камбар-Ата-1 ГЭСинин курулуш жана ишке киргизүү боюнча өкмөттөр аралык келишими жокко чыгарылган.
Миллиондогон каражаттардын сарпталышын текшерүү үчүн Жогорку Кеңеште атайын комиссия түзүлгөн.
