БИШКЕК, 8-дек. — Sputnik. Флоридада кыргызстандык мушкер Фархад Шарипов америкалык атаандашы Эндрю Уитни менен ММА Titan FC 42 турниринин алкагында беттешип, ал күтүлбөгөн окуя менен аяктаганын The Daily Mail басылмасы билдирди.
Америкалык мушкер утам деп өзүнө аябай ишенген, бирок калыстар анын утулганын жарыялаганда эмоциясын кармай албай калганын британ басылмасы жазат. Ал катуу жулкунуп, артында турган кызды бетке чаап алган.
Турнирдин башкы директору Жеф Аронсондун айтымында, кыз олуттуу жаракат алган эмес.
"Учурда абалы жакшы, өзүн жакшы сезип жатат. Аябай коркуп калыптыр. Биз Уитнинин командасына мындан ары мындай нерселер болбосун деп эскертүү бердик", — деди Аронсон.
Фархад Шарипов джиу-джитсу боюнча дүйнөлүк беттештерди байге алган, самбо боюнча Америкада коло байгеге татыган. PFC версиясы боюнча дүйнө чемпиону. Андан сырткары ММА боюнча профессионалдык мушташтарга 26 жолу катышкан.
