Милиция менен таксисттердин чыры: айдоочу кармалып, кылмыш иши козголду

БИШКЕК, 6-дек. — Sputnik. Милиция менен таксисттердин чырына 200дөй киши катышканын Бишкек ШИИБдин маалымат кызматы билдирди.

Окуя кечээ түндө болгон. Анда милиция кызматкерлери рейд учурунда автомашинаны текшерүүнү пландашкан. Себеби, анын ичиндегилер каракуурай чегип жатышы мүмкүн деп шек туудурган. Кайгуул милициясынын билдиришинче машинанын айдоочусу башка таксисттерди чакырып, алар милицияны таш менен чабышкан. Үч милиция жаракат алган.

ШИИБден маалымдашкандай, милиция кызматкерлери буга чейин таксистти өлтүрүп, машинасын айдап кеткен фактыдан улам машинаны текшерүүнү чечишкен.

Милициядан кошумча билдиришкендей, милицияны көргөн жүргүнчү документин көргөзгөн, ал эми айдоочу болсо милициянын талабына көнбөй машинадагы "атайын баскычты" басып башка таксисттерди чакырган.

"Атайын баскыч басылгандан кийин окуя болгон жерге фирманын 200дөй таксисти келген. Айдоочу аны милиция сабаганын айткан. Таксисттер аймактык милицияга жабыла кол салышкан. Мыйзамга таянган милиция өзүнүн тапанчасын колдонгон", — деп ШИИБден маалымдашты.

Аймактык милиция бир нече жолу эскертүү иретинде асманга ок чыгарган. Бул учурда окуя болгон жерге башка Кайгуул милициясы келип калган.

Аймактык милициясы тапанчасын бергенде, ага таксисттер кайтадан кол салышкан.

"Учурдан пайдаланган айдоочу машинасын башка айдоочуга берип, анын машинасы менен окуя болгон жерден качып кеткен", — деп ШИИБ билдирди.

Аталган факты боюнча Кылмыш жаза кодексинин 341-беренеси "Бийлик өкүлүнө зомбулук көрсөтүү" жана 234-беренеси "Бейбашчылык" боюнча кылмыш иши козголгон. ШИИБ ошондой эле аталган жарандарды текшерүү учурунда алар баңгизатын колдонгону аныкталганын маалымдады.

Айдоочу кармалып, Бишкек ШИИБдин убактылуу кармоо жайына киргизилген. Жүргүнчүгө баңгизатын колдонгону үчүн айып пул салынган. Тергөө амалдары жүрүүдө.

Бул окуя боюнча такси фирмасы эч кандай түшүндүрмө бере элек.