БИШКЕК, 6-дек. — Sputnik. Көк-Жар жаңы конушунда такси фирмаларынын биринин айдоочулары менен милиция кызматкерлеринин ортосунда уруш чыгып кеткен. Бул тууралуу Sputnik Кыргызстан агенттигинин кабарчысына Бишкек ШИИБдин Жол кайгуул кызматынын маалымат катчысы Таалайбек Бугубаев билдирди.
Кайгуул кызматынын билдиргенине караганда ошол маалда унаада отургандардын бири таксидеги коркунуч кнопкасын басып, бизди сабаганы жатышат деп айтып ийген. Ошентип аз убакыттын ичинде бир нече унаа жетип келген.
"Келгендер милиция кызматкерлеринен ким экендигин сурап, бир маалда таш менен ургулай башташкан. Милиционерлердин бири үч жолу абага эскертүү иретинде ок чыгарган. Ошол маалда анын башына таш тийди. Ок атылгандан кийин келгендер артка кетенчиктегени менен кетип калышкан эмес. Тескерисинче, куралды берүүнү талап кылышкан", — деди Бугубаев.
Маалыматта айтылгандай жерине кошумча күч жиберилгени менен алар кесиптештерине жакындап бара алышкан эмес. Анткени такси кызматынын унаалары жолду тосуп алышкан. Mazdа унаасындагы адамдарды РИИБге алып кетүүгө аракеттер көрүлгөндө кайрадан таш менен ургулай башташкан.
Чатакка катышкан үч милиционер менен эки таксистти наркологиялык диспансерден текшерүүгө өттү. Анда милиционерлердин каны таза болуп чыгып, ал эми таксисттердин канында баңгизаттын бар экендиги аныкталды.
"Бүгүн милиционерлерди ургула деп үгүттөгөн адамдарды кармоо иштери жүргүзүлөт", — деди маалымат катчы.
Ал эми сөз болуп жаткан такси кызматы аталган окуя боюнча эч кандай түшүндүрмө бере элек.
