БИШКЕК, 5-дек. — Sputnik. КСДП партиясынын тизмесиндеги чыккан чырдан улам Жалал-Абад аймактык шайлоо комиссиянын төрайымы Бактыкан Нуралиева иштен алынды. Бул тууралуу Sputnik Кыргызстан агенттигине аталган шайлоо комиссиясынын мүчөсү Дамир Жүндүбаев билдирди.
Борбордук шайлоо комиссиясы "Ата-Журт", "Ата Мекен" жана "Өнүгүү — Прогресс" партияларынын КСДПны шайлоодон четтетүү боюнча арызын четке кагып, тизме боюнча күнөөнү аймактык шайлоо комиссиясынын төрайымына койгон эле.
"Бүгүн аймактык шайлоо комиссиясында жыйын болуп, Бактыкан Нуралиева АШК төрайымдыгынан алынды. Анткени ал күнөөнү мойнуна алып, өзү арыз жазып берген. Негизи ошол киши тизмедеги алешемдикти байкабай өткөрүп жиберген. Анын ордуна Толгонай Матразакова төрайым болуп шайланды", — деди Жүндүбаев.
Белгилей кетсек, Жүндүбаев кечээ күнү Sputnik Кыргызстан агенттигине КСДП тизмесин өзгөртүп, мыйзамга ылайыкташтырып бергендигин айткан.
