БИШКЕК, 4-дек. — Sputnik. Жалал-Абад аймактык шайлоо комиссиясы тарабынан КСДП партиясына эскертүү берилди. Бул тууралуу Sputnik Кыргызстан агенттигине аталган комиссиянын мүчөсү Дамир Жүндүбаев билдирди.
Эске сала кетсек, буга чейин КСДП партиясынын Жалал-Абад шаардык кеңешке аттанып жаткан талапкерлердин тизмесинде аялдардын квотасы сакталбагандыгы айтылып, "Ата-Журт", "Ата Мекен" жана "Өнүгүү — Прогресс" партияларынан аларды шайлоодон четтетүү боюнча арыз түшкөн.
"Аталган маселе боюнча аймактык шайлоо комиссиясынын жыйыны өтүп, КСДП партиясына эскертүү берүү, аталган партиянын тизмесин түзгөн ыйгарым укуктуу өкүлүн четтетүү жана Жалал-Абад аймактык шайлоо комиссиясынын төрайымы Бактыкан Нуралиеваны кызмат ордунан алуу чечими кабыл алынды. Анткени мыйзам боюнча төрайым 24 саат ичинде партиянын тизмесин карап, кемчиликтер болсо айтышы керек болчу. Ал айткан эмес. Эгер убагында айтылганда маселе жаралмак эмес", — деди Жүндүбаев.
Ал аймактык шайлоо комиссиясынын төрайымы Бактыкан Нуралиеваны ордунан бошотуп, жаңысын шайлоого убакыт тардыгын айтып, шайлоого 10 күн калганда комиссия мүчөлөрүн алмаштырууга болбой турганын кошумчалады.
Мындан сырткары, Жүндүбаев учурда КСДП тизмесин өзгөрткөндүгүн кошумчалады.
"КСДП шайлоодон четтетилбейт. Анткени мыйзам боюнча тизмени убагында берген. Алар шайлоого 3 күн калганга чейин тизмени өзгөртүүгө укуктуу. Учурда тизмесин өзгөртүп, мыйзамга ылайыкташтырып беришти", — деди ал.
Ал эми Борбордук шайлоо комиссиясы" Ата-Журт", "Ата Мекен" жана "Өнүгүү — Прогресс" партияларынын КСДПны шайлоодон четтетүү боюнча арызын четке кагып, тизме боюнча күнөөнү аймактык шайлоо комиссиясынын төрайымына койду.
