БИШКЕК, 1-дек. — Sputnik. Азыркы саатта үч жабыркаган адам дагы деле жандандыруу бөлүмүндө, атайын дем алдыруучу аппараттар алынды. Бул тууралуу Травматология жана ортопедия илим изилдөө борборунун директору Сабырбек Жумабеков Sputnik Кыргызстан агенттигине билдирди.
Анын айтымында, жандандыруу бөлүмүндө жаткан экөө атайын аппарат менен дем алып жаткан болчу, бүгүн түштөн кийин өз алдынча дем ала баштаган.
"Ал эми төртөөнүн бирөөсүнүн абалы бир аз жакшы болгонуна байланыштуу нейрохирургия бөлүмүнө котордук. Баары акырындан сүйлөп, аты-жөнүн айтып, дарыгерлер менен байланышка чыгышты. Абалдары дагы деле оор бойдон, бирок туруктуу", — деди дарыгер.
Ошондой эле ал төртөөнөн сырткары дагы эки бейтап дарыгердин көзөмөлүндө экендигин билдирди.
"Аларды дагы көрүп, жардам бердик. Учурда амбулатордук жол менен үйүндө дарыланып жатышат. Дары-дармектин баары жетиштүү. "Алкан" базарынын кызматкерлери бизде жок дарыларды алып берип жатат", — деди Жумабеков.
Эске сала кетсек, 29-ноябрда эртең менен Бишкек шаарынын түндүк тарабында жайгашкан ири "Дордой" соода-базар комплексинин аймагынын субъектилеринин бири болгон "Алкан" базарындагы негизги өтмөктүн чатыры кулап, кишилерди басып калган. Кырсыктан беш адам жабыркап, ооруканага оор абалда түшкөн.
