БИШКЕК, 29-ноя. — Sputnik. Жогорку Кеңештин төрагасы Чыныбай Турсунбеков Кытайдын Кыргызстандагы элчиси Сяо Цинхуа менен жолукканда интернетти КЭРден алып келүү жагын талкуулагандыгын парламенттин маалымат кызматы билдирди.
Тараптар мындан сырткары интернетти Кытайдан алуу мүмкүнчүлүктөрүн, КЭРдин элчилигиндеги консулдук бөлүмдүн ишин жаңылоо, кыргыз-кытай фондусун түзүү маселесин да талкуулады.
Августтун башында Кыргызстандын интернет-провайдерлери казак өнөктөштөрдөн транзиттин 3-4 эсеге кымбаттай турганы тууралуу маалымат алышкан. Ошондон бери КР компаниялары казак тарап менен сүйлөшүүлөрдү жүргүзүп келет.
Ноябрь айынын башында Байланыш операторлор ассоциациясынын жетекчиси Нурбек Абасканов Казакстандык операторлор Кыргызстандын интернет провайдерлери менен секундасына бир мегабит интернет үчүн 15 долларлык тариф белгиленген келишимге кол койгонүн билдирген.
Ал эми премьер-министр Сооронбай Жээнбеков интернеттин жогорулашы боюнча "Кыргызтелеком" ААКтын жетекчилигинин аракетин иликтөөнү укук коргоо органдарына тапшырган болчу. Башкы прокуратура ага юридикалык баа бериши керек.
