БИШКЕК, 9-ноя. — Sputnik. Бишкек шаарынын Арча-Бешик жаңы конушуна Газпром курган дене тарбия комплекси мэриянын карамагына берилип, кардарлар үчүн эшигин ачканын муниципалитеттин маалымат кызматы билдирди.
Аталган комплекс октябрь айынын ортосунда Алмазбек Атамбаев жана "Газпром" компаниясынын жетекчиси Алексей Миллердин катышуусу менен ачылган.
Аталган жай "Газпром — балдарга" социалдык программасынын алкагында курулуп, жалпысынан 5 миң чарчы метрди ээлейт. Ичи заманбап спорт шаймандары менен толукталып, 700гө чейин көрүүчүнү батыра алат. Күн сайын бул комплекс 500гө чейин кишиге кызмат көрсөтүүгө жөндөмдүү.
"Ал жакта волейбол, баскетбол, футбол, бокс, эркин күрөш, фитнес жана хореография боюнча ийримдер ачылган. 8 жаштан 18 жашка чейин балдар бекер машыга алышат", — деп айтылат маалыматта.
Ошондой эле бул жакта спорттун башка түрлөрү боюнча спортчуларды да даярдоого болот.
Аталган спорт комплексинин директору болуп Нурдин Кутманалиев дайындалды.
