БИШКЕК, 4-ноя. — Sputnik. Улуттук курама топтун 16 футболчусу Манила шаарында (Филиппин) жолдоштук беттешке даярдык көрүп жаткандыгын Футбол федерациясынын маалымат кызматынан кабарлашты.
Филиппиндин борборунда 9-ноябрда кыргыз-филиппин курама топторунун ортосунда жолдоштук беттеш өткөрүлөт. Бул кыргыз курама командасы үчүн чет өлкөдө өткөн алгачкы жолдоштук оюн болуп эсептелет.
Жалпы 23 оюнчу катталган. Алардын 16сы Манилада беттешке даярдык көрүүдө. Ал эми калган жетөө жакынкы аралыкта барышат.
Буга чейин белгилүү болгондой, негизги жарым коргоочу Мирлан Мурзаев оюнга катышпай турган болду. Аны түркиялык "Ушакспор" клубу жибербей койгон.
Жума күнү беттеш өтө турган Rizal Memorial Stadium стадионунда машыгуу башталат.
