Жыйынтыгында 22 үй-бүлө турак жайсыз калган. Төбөсү түшө турган үйдө учурда айласыздан эки үй-бүлө күн кечирүүдө.
Кырсыкка чейин аталган жатаканада жашаган Айсулуу Алыбаева учурда үй толугу менен урайын деп калганын айтты.
"Бул жерде ар убак ным сакталып турат. Ошондон улам жаш балдар күн сайын эле ооруп жүрүшөт. Ал эми дубалдар көчө турган жагдайга келип калды. Адамдарды басып калабы деп корком", — деди Алыбаева.
Алыбаева жергиликтүү бийлик жер берүүнү убадалап, бүгүнкү күнгө чейин аны аткарбай жатканын баса белгиледи. Ал эми Шопоков шаарынын мэри Сулейман Умаралиев бөлүп берүү үчүн жер жок экенин билдирди.
"Мен мыйзам бузуп трансформацияланбаган жерди бере албайм. Өрт болгон жылы жабырлануучуларга шаар тургундары азык-түлүк чогултуп, убактылуу бала бакчадан орун бергенбиз", — деди Умаралиев.
Шопоковдун мэри жабырлануучуларга 20 миң сомдон каражат берилгендигин кошумчалады.
