БИШКЕК, 31-окт.— Sputnik. Москвада басмаканадан чыккан өрттөн каза болгон кыз-келиндердин үй-бүлөсүнө 300 миң сомдон компенсация төлөнүп берилди. Бул тууралуу Мамлекеттик миграция кызматы билдирди.
Эске салсак, 27-август күнү Москва шаарындагы "Печатный экспресс" деп аталган басмаканада өрт чыгып, кырсыктан 14 кыргызстандык кыз-келин каза болгон. Анын кесепетинен 11 бала жетим калган.
9-сентябрда Москва шаарында Кыргызстандын мамлекеттик миграция кызматы Россиянын Эмгек жана коомдук жактан коргоо министрлиги, ошондой эле ички иштер министрлигинин өкүлдөрү менен биргеликте жыйын өткөргөн. Сүйлөшүүлөрдүн жыйынтыгы менен маркум кыз-келиндердин үй-бүлөлөрүнө 300 миң сом өлчөмүндө компенсация төлөө чечими чыккан.
Ошондой эле Миграция кызматы Кыргызстан ЕАЭБге мүчө болгондуктан өлкө жарандары Россияда патенти жок иштей аларын эскертти.
