БИШКЕК, 30-окт. — Sputnik. Жер планетасындагы өзөктүк согуш суу талаштан улам чыгышы мүмкүн. Бул тууралуу БУУнун окумуштууларына таянуу менен РИА Новости жазып чыкты.
Маалыматта өзөктүк согуш АКШ менен Россиянын ортосунда эмес, Пакистан менен Индиянын ортосунда чыгышы мүмкүндүгү айтылат.
"Инд дарыясындагы бассейн "бомба" болушу мүмкүн. Анткени ал жарылса, суу тартыштыгын жаратып, аймактагы климаттын өзгөрүшүнө алып келет. Бир ай мурда Индия Пакистан менен 1960-жылы дарыяны жөнгө салуу боюнча түзгөн келишимди бузганын жар салды", — деди БУУнун суу ресурстары жана курчап турган чөйрөнү коргоо институтунун директору Владимир Смахтин.
Окумуштуулар эки тараптуу келишимдин бузулушу менен чоң жаңжал чыгып, ал өзөктүк согушка айланып кетиши мүмкүн деп божомолдоп жатат.
