БИШКЕК, 25-окт. — Sputnik. Казакстандын саламаттык сактоо жана социалдык өнүгүү министри Тамара Дүйсенова Казакстандын кургак учукка каршы дары-дармегин сыноодо кыргызстандык жарандардын каза табышына түшүндүрмө бергенин Sputnik Казакстан жазып чыкты
Буга чейин Кыргызстандын Башкы прокуратурасы мыйзамсыз сыналган ФС-1 дары-дармегинен эки бейтап каза болгонун жарыялаган.
"Бул каражат жеке уюм тарабынан жаңы эле иштелип чыккан. Массалык түрдө сатыкка чыгаруу үчүн ар бир дары-дармек 15-20 жыл ар кандай клиникалык изилдөөдөн өткөрүлөт", — деп билдирди Дүйсенова.
Дары-дармекке болгон сыноо кургак учук менен ооруган адамдарга жүргүзүлгөн. Натыйжада каражат 54 бейтаптын онуна терс таасирин тийгизсе, экөө каза болгон.
Көзөмөлдөө органы Улуттук фтизиатрия борбору менен Дары-дармек менен камсыздоо жана медициналык техника департаментинин кызматкерлерине кылмыш ишин козгоду. Учурда тергөө иштери жүрүүдө.
