БИШКЕК, 25-окт. — Sputnik. Медициналык борбор ачып онкологиялык дартка кабылган жарандарды дарылап келген Ашым Зайналиевге мыйзамсыз дарылоо беренеси боюнча кылмыш иши козголгонун Бишкек шаардык ички иштер башкармалыгынан кабарлашты.
Зайналиев милиция кызматкерлери аны опузалап акча талап кылышканын айтып көрсөтмө берген. Буга байланыштуу Ички иштер министрлигине караштуу жеке коопсуздук кызматынын адистери кызматтык териштирүү баштаган.
"Эгер факты далилденсе, милиция кызматкерлери кызматтан алынып кылмыш иши козголушу ыктымал", — деп айтылат маалыматта.
Тез жардам кызматынын бригадасы аталган медициналык борбордон 56 жаштагы аялдын каза болгондугун аныктагандан кийин бул маалыматтын актуалдуулугу күчөдү.
Учурда окуя боюнча текшерүү иштери жүргүзүлүп, Саламаттык сактоо министрлиги тарабынан комиссия түзүлдү. Ал эми Укук коргоо органдары тарабынан иликтөө иштери башталды.
Zanoza ошондой эле Зайналиев менен түз байланышка чыкканда ал тиешелүү лицензиясы жок экенин айтканын жазып чыкты.
