БИШКЕК, 20-окт. — Sputnik. Кыргызстандын Жарандык авиациялык агенттиги жарандарга самолетко Samsung Galaxy Note 7 үлгүсүндөгү уюлдук аппараттарды албоону сунуштаганы агенттиктин сайтына жарыяланды.
Galaxy Note 7 тогуз өлкөдө 19-августтан тарта сатыла баштаган. Ал эми жалпыга маалымдоо каражаттары Samsung компаниясы Galaxy Note 7 аппаратынын батарейкасы жарылып кетүүсү ыктымал болгондуктан сатыктан ала турганын жазып чыгышкан.
Мындан кийин компания аталган үлгүдөгү аппараттардын бардыгын жаңыга алмаштырарын жарыялаган. Буга чейин смартфондун батарейкасы жарылып, унаа ичинде өрт чыккандыгы тууралуу маалымат тараган.
Кийинчерээк түштүк кореялык Samsung Electronics компаниясы Galaxy Note 7 смартфонун экспорттоону убактылуу токтоткон. Буга аппараттын аккумуляторунан өзүнөн өзү өрт чыгат деген маалыматтар себеп болгон.
