БИШКЕК, 18-окт. — Sputnik. Калыңы үчүн берилген 70 миң сомду алган кыз дайынсыз качып кеткен. Бул тууралуу Sputnik Кыргызстан агенттигине "Импера групп" ишканасынын юристи Эмил Жапакбаев билдирди.
Анын айтымында, окуя Ош шаарында болгон.
"Жалал-Абаддык 26 жаштагы жигит Оштун 22 жаштагы кызы менен төрт айдан ашуун сүйлөшүп жүргөн. Анан баш кошууга белсенишкенде жаштардын ата-энеси жолугуп, бала тараптан кыз тарапка 70 миң сом берилген. Андан соң кыз телефонун өчүрүп, дайынсыз жоголгон. Эки айдай байланыша албаган жигит кыздын ата-энесине барган", — деди Жапакбаев.
"Кыз ооруканадамын деген шылтоо менен дагы эки айдай убакыт созгон. Аягында ата-энеси кызын таба албай жатканын айтып, колдорунан эч нерсе келбей тургандыгын билдирген. Ошондон кийин жигит бизге кайрылган", — деди ал.
Жапакбаев юристтер тарабынан арыз даярдалган учурда кардары кайра баш тартканын айтып, ачыкка чыгууну каалабагандыгын кошумчалады.
