БИШКЕК, 14-окт. — Sputnik. Бүгүн эртең мененки саат 7.00дөн баштап Бишкек тургундарына жылуулук бериле баштаганын мэрия билдирди.
Борбор калаада аба ырайы бейшемби күнү кечке маал бузулуп, түн ичинде кар жаап, суук түштү. Буга чейин мэр Албек Ибраимов калкка жылуулук 14-октябрдан тарта бериле турганын айткан.
"Эртең менен саат 7.00дөн баштап социалдык объектилерге жылуулук бериле баштады. Эки-үч күндүн ичинде системага шаар толугу менен кошулат", — деп айтылат билдирүүдө.
"Электр станциялары" ишканасынан Бишкек ТЭЦи жылуулук иштеп чыгып, "Бишкекжылуулуктармагы" белгилеген температуралык графикке туруштук берип жатканын белгилешти.
