БИШКЕК, 14-окт. — Sputnik. Эки жыл мурда комада жатып, төрөт үйүндө каза болгон Айнура Сагынбаеванын өлүмүнө дарыгерлердин шалаакы мамилеси себеп болгон деген тыянак чыгып, үч дарыгердин ар бири 4 жылга кесилди. Бул туурасында Sputnik Кыргызстан агенттигинин аймактык кабарчысына Ош шаардык ИИБдин басма сөз кызматынын өкүлү Замир Сыдыков билдирди.
Маалыматтарда 1988-жылы туулган Сагынбаева операциядан соң 43 күн комада жатып, төрөт үйүндө көз жумгандыгы айтылат. Бул боюнча маркумдун атасы укук коргоо органдарына арызданып, Ош шаардык ички иштер башкармалыгынын 5-бөлүмү иликтөө иштерин жүргүзгөн.
"Ош шаардык соту КР Кылмыш кодексинин 119-беренесинин (жүктөлгөн милдетти талапка ылайык аткарбоо), 313-берененин (пара алуу) негизинде шаардык төрөт үйүнүн кызматкерлери К.А., А.У. жана М.Э. аттуу дарыгерлер күнөөлүү деп табылып, ар бири 4 жылга эркинен ажыратылды", — деп билдирди Сыдыков.
"Андан тышкары, мамлекетке жаза катары ири суммадагы акча төлөө милдеттендирилди", — деп кошумчалаган маалымат кызматынын өкүлү.
Сыдыков акыркы бир жыл аралыгында эле аталган төрөткананын гинекология бөлүмүнүн мурдагы дарыгери, азыр жоопко тартылган К.А. катышкан операциядан беш аял каза болгонун билдирип, бул факты тыкыр иликтенип жаткандыгын билдирген.
"Тагыраак айтканда, бир нече жыл ичинде Жылдыз Алыкулова, Айнура Сагынбаева, Назира Молдолиева, Кулпунай Курамова, Нурбүбү Султанова аттуу келиндер жарык дүйнө менен кош айтышып, бирок аталган дарыгер К.А. сөгүш алуу менен гана чектелип келген", — деп билдирген Сыдыков.
Маалыматтарда ал дарыгердин 31 жылдык эмгек стажы бар экендигин айтылган.
Бул жааттагы абалга көз салсак, былтыр төрөт учурунда каза болгон энелердин саны 100 миң балага 37,9ду түзгөн.
