Эл өкүлү акыркы жылдары эң көп гранттарды Билим берүү министрлиги алып жатканын айтып, буга карабастан эмнеге бул тармакта жылыштар байкалбай жатканына кызыккан.
Мусабекова кээ бир айылдагы директорлор мектепти 20 жылдан бери башкарып, аны өзүнүн "жем жеген" акыры кылып алганына токтолду. Мугалимдерди жумушка алууда да анын билимине эмес, капчыгына көңүл бөлүнүп жатканын айткан.
"Өзүнө ишенбеген киши пара берет. Илгери мугалимдер тыкыр текшерүү, экзамен менен алынчу. Мугалим ар тараптан өнүгүш керек, издениш керек, окуш керек, алар мектепке уй сааганы, же кой кайтарганы келишпейт", — деди эл өкүлү.
Ал ошондой эле бул маселени айтып чыккандан кийин айыл жергесиндеги мугалимдер чалып, көп жылдан бери көтөрүлбөй келген маселени көтөргөнү үчүн ыраазычылыгын билдиргенин маалымдады.
