БИШКЕК, 30-сен. — Sputnik. 777ААА мамлекеттик номерин сатуу боюнча болгон онлайн-аукциондун жеңүүчүсү 1 миллион 716 миң сомду төлөгөнүн Мамлекеттик каттоо кызматы билдирди.
Эскертсек, аукцион 28-сентябрда болуп, жеңүүчү мамлекеттик номерди 1 миллион 716 миң сомго сатып алган. Эми аталган сумманын 91 пайызы (1 млн. 561 миң 560 сом) республикалык бюджетке төлөнсө, 9 пайызы Мамкаттоонун алдындагы "Инфоком" мамлекеттик мекемесинде калат.
"Бул сумма 322 кишинин пенсиясын, же 111 мугалимдин айлыгын, же аз камсыз болгон үй-бүлөдөгү 1927 балага жөлөк пул төлөөгө жетмек", — деп Мамкаттоо кызматынан маалымдашты.
Жеңүүчүгө ыраазычылык катары сертификат жана белектер берилген. Бул онлайн-аукциондун жүрүшүнө 20 миң киши көз салган.
Ошондой эле, бул номерди Журат Абдуллаев аттуу ишкер сатып алган деген маалыматты четке кагып, ал чындыкка коошпой турганын мекемеден билдиришти.
