Дүйшөмбү күнү болжол менен саат 17.10дор чамасында милиция кызматкерлери кетип бараткан кызматтык автоунаасы менен 11 жаштагы кызды коюп кеткен.
Бишкек ШИИБдин Кайгуул милициясынын башкармалыгынан билдиришкендей, алар чакыруу түшкөн жерге шашып бараткан.
"Техникалык экспертизага ылайык, кызматтык автоунаа саатына болжол менен 100 чакырымдык ылдамдык менен бара жаткан. Машинанын тормозун басканда ал 51 метрге чейин сүрүлүп барган. Анын ичинде үч жүргүнчү болгон", — дейт Бишкек ШИИБдин Кайгуул милициясынын маалымат катчысы Таалай Бугубаев.
Ал ошондой эле жабыр тарткан 11 жаштагы кыз учурда Балдардын Бишкектеги шаардык 3-ооруканасында дарыланып жатканын айтты. Дарыгерлердин айтымында, абалы канааттандырарлык экенин жана милиция тарабынан кызга акчалай жардам берилип жатканын кошумчалады.
