БИШКЕК, 21-сен. — Sputnik. Түрк полициясы "Кыргызстандын имамы" деп айыпталган Азиз Ашчы гүленчилерге тиешеси жок экенин айтты. Бул тууралуу Haberler сайты билдирди.
Түркиянын Зонгулдак шаарында атайын операциянын жыйынтыгында кармалган 9 кишинин арасында 43 жаштагы Азиз Ашчы да болгон. Алардын бардыгы дин аалымы Фетхуллах Гүлендин тарапташтары деп айыпталууда.
Сурак учурунда Азиз Ашчы ага коюлган бардык айыптарды четке кагып, гүленчилер менен эч убакта катышпаганын айтты.
"Мени гүленчилер менен эч бир нерсе байланыштырбайт. Өзүмдүн эмерек чыгарган чакан фирмама сатып алган материалдарды дагы аларга таандык болбогон компаниялардан алам. Эгер алар менен кандайдыр бир катышта болсом мени Түркияга келгенде жатаканада же мейманкалардан табышмак. Мен мындай мейманканаларга бир да жолу түнөгөн эмесмин", — дейт ал.
Эске салсак, 16-июлга караган түнү Түркияда козголоңчулар аскердик төңкөрүш жасоого аракет кылган. Негизги кагылышуу Анкара менен Стамбул шаарларында өткөн. Акыркы маалыматтар боюнча андан 200дөн ашуун киши өлүп, эки миңге жакыны жарадар болгон.
Түрк бийлиги төңкөрүш жасоо аракетинин жоопкерчилигин АКШда жашаган динаятчы Фетхуллах Гүленге жүктөп, анын экстрадициясын талап кылган. Гүлен төңкөрүш аракетин кескин сындап, ага тиешеси жок экенин айтып келет.
