АСТАНА. 20-сен.— Sputnik. Кара тизмеге кирип калган мигранттар радикалдык топторго оңой тартылып кетүүчү аярлуу катмар болуп турат. Мындай пикирин эксперт Маметбек Мырзабаев Астана шаарында өткөн жыйында билдирди.
Анын айтымында, Миграция боюнча эл аралык уюмдун колдоосу менен Кыргызстанга кайра катып келип жаткан мигранттардын абалы изилденген.
Эксперттин пикиринде, изилдөөнүн жыйынтыгы Кыргызстанга кайтып келген мигранттардын саны өскөндүгүн, жана аны менен бирге алар үй-бүлөдөгү бөлүнүп-жарылуу, жумушсуздук сыяктуу көйгөйлөргө туш болуп жаткандыгын көрсөткөн.
"Кыргызстанга келгендер жумуш таба албай жатышат. Үй-бүлөнүн бир мүчөсү Россияда, экинчиси Кыргызстанда калып, ажырымга учураган учурлар катталууда", — деди ал.
Мырзабаев чет өлкөдө жүргөн мигранттардын Кыргызстанга кайтып келгенден кийинки жашоосуна мамлекеттик деңгээлде кам көрүү керек деген пикирин айтты.
"Мамлекет Кыргызстанга кайра кайтып келген мигранттарды интеграциялоонун жолдорун али ойлоно элек. Ал эми Тажикстанда мигранттар каттоого алынып, алар үчүн атайын программалар иштелип чыгууда", — дейт эксперт.
Мырзабаев, изилдөөлөрдүн жыйынтыгында кара тизмеге кирип калган мигранттардын радикалдык топторго оңой тартылып кетүүчү аярлуу катмар экени тастыкталганын да кошумчалады.
"Мындай адамдар мамлекетке таарынгандар. Социалдык тармактарды колдонбой, обочолонуп, өздөрүн коомдон алыс кармап турат жана тартынышат. Кара тизмеге кирип калганын айткандан тартынган мигранттар бар. Алар эл алдында жолу болбогон, ордун таппаган адам катары көрүнүп калам деп ойлошот. Аз да болсо мигранттардын арасында маргиналдашуу бар", — деди Мырзабаев.
Эксперттин айтымында, чет өлкөгө кетип жаткан мигранттар кабыл алуучу өлкө тууралуу толук маалыматтын жоктугунан улам түрдүү кыйынчылыктарга кабылып жатат.
Бейрасмий маалыматтарда мигранттардын толкуну көп агылган Россияда бир миллионго чукул кыргызстандык мигранттар бар экендиги айтылып келет.
