БИШКЕК, 29-авг. — Sputnik. Москва шаарындагы өрттөн кыргыз мигранттарынын каза болушу бүтүндөй кыргыз журту үчүн чоң кайгы болду. Учурда баарыбыздын кабыргабыз кыйышып, сай-сөөгүбүз сыздап турган чагы.
Эң өкүнүчтүүсү — каза болгондор жалаң кыз-келиндер болгону. Албетте, алар Москва шаарына жыргап кеткенинен барган эмес. Башкы маселе — жумушсуздук.
2015-жылы өткөн парламенттик шайлоо алдында азыркы депутаттар жумушсуздук маселесин чечүүдө эмне убадалаганын эстеп көрүүнү чечтик.
"Өнүгүү-Прогресс" партиясынын лидери Бакыт Төрөбаев шайлоо алдында 61 ишкана курууну убада кылган. Бул тууралуу депутат "Жаңы Ордо" гезитине маек куруп жатып билдирген. Ал эми макалынын электрондук версия 2014-жылдын 9-декабрында партиянын расмий сайтында жарыяланган.
"Биз 61 деген экономикалык программа кабыл алганбыз. Бул 61 ишкананы куруу дегенди түшүндүрөт. Буга чейн өлкө боюнча 11 МТС (мотордук-трактордук станция) ачып, эки завод куруп бүтсөк, эки завод ушу тапта курулуп жатат. Эгер "Өнүгүү-Прогресс" партиясы шайлоону жеңип, өкмөттүн курамына кире турган болсо, ушул программанын негизинде иш жүргүзөт. Анда ар бир райондо МТС ачуу, анын жанына кайра иштетүүчү заводдорду жаратуу, кооператив түзүү идеялары каралган", — деген Төрөбаев.
"Кыргызстан" партиясы 100гө чукул өнөр жайды ишке киргизүүнү убадалаган.
Мындай убаданы партиянын саясий кеңешинин мүчөсү Шаршенбек Абдыкеримов Баткендеги шайлоочулар менен жолугуп жатып берген. Бул тууралуу партиянын расмий сайты билдирет.
"Биздин партиянын мүчөлөрү Баткен аймагы боюнча 100гө чукул өнөр жайларды ишке киргизүүгө белсенип жатат. Кытайлык инвесторлор менен биргелешип, кыш заводдору, цемент, акиташ заводдорунун курулуштарына өзүңүздөр күбө болуп турасыздар. Өзүбүз аракет кылсак, чет жерге жумуш издебей, үй-жайыбызды таштабай эле ушул жерден баар табабыз. Биздин топурак, ташыбыз, суубуз, кендерибиз өзүбүздүн кол менен иштетилип, пайдасын көрүүгө тийишпиз", — деген Абдыкеримов.
Шайлоо алдындагы убадаларынын бири катары КСДП жумушсуздук маселесин чечүүнү айткан. Бул тууралуу партиянын шайлоо алдындагы чыккан жеке гезитинде жазылган.
Аталган гезитте "Экономикага 5 миллиард доллардан кем эмес чет өлкөлүк тикелей инвестиция тартуу, 120 миңден кем эмес жаңы жумуш орундарын түзүү, өлкө кирешесин 5 жылда эки эсеге көбөйтүү" убадасы жазылган.
"Туризм", "Көмүр" улуттук кластерлеринин, "Эгин", "Шекер", "Эт", "Май", "Жүгөрү", "Сүт" сыяктуу айыл чарба кластерлеринин алкагында 70 миң жумуш орундары түзүлөт", — деп айтылат убадада.
"Балдардын жаркын келечеги үчүн, таза жашоо үчүн шайлаңыздар. Коррупцияны жоебуз", — деген Салянова.
Ал эми 30-сентябрдагы Кемин райондук шайлоочулар менен жолугушууда Жоомарт Оторбаев жумушча орундар бир гана шаарларда эмес, аймактарда да түзүлөрүн айткан.
"Биз борбор калаадан алыс жайгашкан аймактарга жумуш орундарын түзөбүз. Бул кадам мамлекеттин өнүгүүсүнө алып келет. Мамлекет аймактардын өнүгүүсүнө көңүл бурушу керек", — деген Оторбаев.
Парламенттик шайлоого аттанган "Республика — Ата-Журт" партиясынын лидери Өмүрбек Бабанов чет жакта иштеп жаткандарды мигрант эмес, инвесторлор деп атаган.
Белгилей кетсек, бул айтылган убадалардын бир тамчысы гана. Ошентсе да ушул убадалардын айрымдары аткарылып калса, чет жакта иштеп жүргөн боордошторубуз өлкөгө кайтып келет беле деген илгери үмүт.
Аталган партиялар жакынкы күндөрү экинчи сессиясын баштоо алдында турат. Буга чейин биринчи сессияда сегиз ай иштеп, жайкы эс алууга чыккан.
