БИШКЕК, 20-сен. — Sputnik. Россиянын Владимир шаарында HOWO үлгүсүндөгү цемент ташыган автоунаа жол кырсыгына кабылып, андан 13 машина бүлүндү. Бул тууралуу аймактын мамлекеттик автоинспекция башкармалыгынын сайтында маалымдалды.
Жол кырсыгы күндүз Полина Осипенко көчөсүндөгү №57 үйдүн жанында болгон.
"Цемент ташыган HOWO үлгүсүндөгү машина жолдун каршы тарабында келе жаткан ПАЗ автобусун, ВАЗ-2114 жана Toyota Camry автоунааларын жөөлөп кеткен. Андан кийин ал жол жээгинде унаа токтотуучу жайдагы машинаны каккан. Натыйжада, күү менен урулгандыктан, жеңил унаанын артындагы машиналар бири-бирин сүзгөн", — деп айтылат маалыматта.
Полициянын маалыматына ылайык, жол кырсыгынан жалпысынан 13 машина жабыр тарткан. Кишилерден эч ким жаракат алган эмес.
"HOWO үлгүсүндөгү машинанын айдоочусу шаардык ооруканага жеткирилген. Алдын ала маалымат боюнча айдоочу мас абалында болгон", — деп айтылат полиция тараткан билдирүүдө.
Жол кырсыгы болгон жерде тийиштүү кызматтын өкүлдөрү иштеп, окуянын чоо-жайын аныкташмакчы.
