БИШКЕК, 13-сен. — Sputnik. Ааламды түгөл кыдырып чыккан норвегиялык саякатчы Гуннар Гарфорс бир келип көрүп кетүү үчүн сунуштаган 12 өлкөнүн ичине Кыргызстан да кирген.
Графорс 37 жашында дүйнөнүн 198 өлкөсүн кыдырып чыгып, рекорд жараткан.
Саякатчынын тизмесинде биринчини "дракуланын мекени" — Румыния ээлеген. Андан соң ажайып Мадагаскар, кийинкиде ысык булактары бар Исландия турат. Төртүнчү орунду ээлеген Вьетнамдан кийин эле Кыргызстан сунушталат.
"Ажайып жаратылыш менен базарларына сөз жетпейт. Эли ачык-айрым, меймандос келет", — дейт Кыргызстан тууралуу саякатчы.
Гарфорс 17 жашынан бери саякаттап келет. 2014-жылы бир күндө 19 өлкөнү көрүп чыгууга жетишип, дүйнөлүк рекорд жараткан. Мындан тышкары, Гиннес китебине аалам кезген эң жаш саякатчы катары да кирген.
