БИШКЕК, 5-сен. — Sputnik. Өзбек тарап чек ара маселелерин чечүүдө конструктивдүү кадамдарга барууга даяр экенин премьер-министр Сооронбай Жээнбеков Үңкүр-Тоонун айланасында пайда болгон маселелер боюнча жумушчу жыйында билдиргенин өкмөттүн маалымат кызматы кабарлады.
Жыйынга тышкы иштер министри Эрлан Абдылдаев, ички иштер министри Кашкар Жунушалиев, Улуттук коопсуздук мамлекеттик комитетинин төрагасы Абдил Сегизбаев, Мамлекеттик чек ара кызматынын башчысы Абдикарим Алимбаев, Маалыматтык технология жана байланыш мамлекеттик комитетинин жетекчиси Бакыт Шаршембиев, мамлекеттик чек ара маселелери боюнча өкмөттүн атайын өкүлү Курбанбай Искандаров катышты.
Анда Үңкүр-Тоонун айланасында түзүлгөн кырдаал боюнча жана өзбек тарап кармап кеткен төрт жаранды бошотуу боюнча жасалып жаткан иштер тууралуу маалыматтар берилди.
"Чек ара маселелери, анын ичинде кармалып кеткен кыргызстандыктар тууралуу маселени Өзбекстандын премьер-министри Шавкат Мирзиеев менен жолукканда талкууладым. Өзбек тарап чек ара маселелерин жөнгө салууда конструктивдүү кадамдарга барууга даярдыгын билдирди", — деди Жээнбеков.
Өкмөт башчы Өзбекстандын тийиштүү мамлекеттик органдары менен тыгыз иштерди алып баруу боюнча жыйындын катышуучуларына тапшырма берди.
