БИШКЕК, 29-авг. — Sputnik. Өзбекстандын милициясы тарабынан кармалган Үңкүр-Тоодогу телемунаранын төрт кызматкери үйлөрүнө кайтыша элек.
24-август күнү телемунарада иштеген кыргызстандык төрт адис Янги-Курган райондук милициясына алып барылган. Аксы районунун акими Медет Айдаралиев кармалган төрт жарандын экөө Ош облусу, бирөө Сузак районунун, дагы бири Кербен шаарынын тургуну экенин билдирди.
Sputnik Кыргызстан агенттиги телемунарада тогуз жылдан бери иштеп келген Нурбек Усупбаевдин апасы Барчын Усупбаева менен байланышып, ал-абалын сураганда кан басымы көтөрүлүп жатканын айтты.
"Баламды ойлоп түн уйкумдан айрылганымды сурабагыла. Кан басымым көтөрүлүп жатат", — деген Барчын апа бир сыйра ыйлап алды.
Анын айтымында, баласынын өзбектер тарабынан кармалып кеткенин кечке жуук кайнагасынан уккан.
"Баламды кайтарып бергиле деген сураныч менен акимге, милицияга кайрылдым. Алар "чоңдор келсин, ошолор сүйлөшөт, сабыр кылып туруңуз" дешти", — дейт эне.
Барчын апа 50 жашта. Жолдошу каза болуп калган. Эки уул, эки кызы бар. Нурбек үйдүн эң улуусу жана багуучусу. 19 жаштагы кичүү уулу үйлөнө элек. Карындаштары күнүгө апасына телефон чалып байкесин сурап ыйлашат.
Ал мындай кырдаалдын жаралышына кимди күнөөлөрүн билбей турганын айтып ыйламсырады.
Белгилей кетсек, Үңкүр-Тоо кыргыз-өзбек чек арасындагы такталбаган аймак болуп саналат. Ал эми кыргыз-өзбек чек арасынын жалпы узундугу 1 378 чакырым болсо, анын 1 058и аныкталган. Бүгүнкү күндө 58 жер аянтындагы 324 чакырымдык чек ара талаштуу бойдон калууда.
